Wala sang may na-rekord nga ash emission event ang Philippine Institute of Volcanology and Seismology (PHIVOLCS) sa bulkan Kanlaon sa sulod sang tatlo ka adlaw nga monitoring sini matapos sang nagluntad nga minor eruption sa bulkan tinalikdan nga Pebrero 6.
Base sa latest update, 15 ka volcanic earthquakes ang narekord sang Phivolcs sa Mt. Kanlaon sa sulod sang 24 oras humalin Pebrero 9 tubtob las-12 kaina sang kaagahon, Enero 10, 2025.
Samtang, nagbuga naman ini sang 2,183 ka tonelada sang sulfur dioxide, ini ang mas mataas kun ipaanggid sa narekord tinalikdan nga adlaw sa diin yara lang sa 1,611 ka tonelada sang asupre ang ginbuga sinj.
Nakita man nga wala untat ang pagsungaw sini sa diin nagatakos sa 50 ka metros ang kataason sang plume sini padulong sa west nga direksyon.
Nagapadayon naman ang ground deformation sang bulkan sa sini nga mga tinion.
Sa karon, padayon nga ginadumilian ang pagpalupad sang ano man nga sahi sang aircraft malapit sa baba sang bulkan.
Ginaabisuhan ang tanan nga may posibilidad sa gihapon sang gulpi nga paglupok sang bulkan, pag-ilig sang lava, pag-ulam sang abo, Pyroclastic Density Current (PDC), rockfall kag pagbaha sang lahar kun may mabaskog nga pag-ulan.
Nagpabilin sa gihapon sa alert level 3 ang Mt. Kanlaon.
