Makapungko na bilang Barangay Tangub Kagawad ang sadto kandidato nga nagtupa sa number 10 slot sang October 2023 elections nga si Erwin Montaño.
Pormal na nga ginproklamar sang Commission on Elections (COMELEC) si Montaño bilang kagawad kaina sang aga, Pebrero 10,2025 sa Rodolfo Medel Sr. Elementary School.
Sa ginpapanaog nga final decision sang COMELEC En Banc, nga “petition to correct manifest of error” nakasaad diri nga magapungko bilang number 4 kagawad sang Barangay Tangub.
Sa interview sang DYHB kay Montaño ginpahayag sini nga antis pa man natigayon ang recount, yara lang sa 2,400 ang boto nga nakuha sini rason nga nagtupa siya sa ika-pulo nga pwesto sa pagka Kagawad.
Dugang pa sini, sa isa ka presinto gid sila nagkaproblema sa diin kaangay nga nagtalang ang mga canvassers sa pag-isip sang boto bangud tatlo ka mga Montaño ang nagpadalagan bilang Kagawad.
Sa pihak nga bahin, magapaanog naman sa pwesto ang nagpungko sa ika-7 nga pwesto nga si former Barangay Kagawad Hannah Sanchez.
Nagpasalamat man si Sanchez sa mga Tangubnon sa pagsuporta nga ginhatag sang mga ini sa iya sa malip-ot nga tinion sang iya pagserbe bilang Kagawad.
Suno kay Montaño, malipayon siya nga nahatag na ang hustisya sa mga pumuluyo, apang nasubuan man ini nga makakas sa pwesto ang iya kaupod sa partido nga si Sanchez.
Base sa desisyon nga ila nabaton sang February 6, 2025 yari ang listahan sang mga Barangay Kagawad sang Tangub:
1. Luz Atienza
2. Paula Arca
3. Sally Canada
4. Erwin Montaño
5. Marlon Genovea
6. Marilou Magallanes
7. Katrina Sonata
