Magahiwat sang Provincial Command Center Meeting sa probinsiya sang Negros Occidental sa maabot nga Pebrero 18. Ginpahayag ni Provincial Election Supervisor Atty. Ian Lee Ananoria, isa sa mga talakayon sa meeting ang magkatuhay nga assessment sang Commission on Elections Central Office kag sang Philippine National Police sa security situation sang probinsiya may angot sa Mayo 12 nga national and local elections. Gin-categorize sang Comelec Central Office ang mga banwa sang Isabela kag San Enrique bilang Yellow ukon “areas of concern” bangud sang pagluntad sang election-related incidents sa nakaligad nga duha ka eleksyon subong man presensiya sang intense political rivalry. Samtang, Orange ukon “areas of immediate concern” naman ang Calatrava, Cauayan kag Sipalay City bangud sang serious armed threats gikan sa mga rebelde. Apang sa bahin sang Philippine National Police, makabig nga low-risk area ang Negros Occidental may angot sa nagahilapit nga eleksyon. Suno kay Atty. Ananoria, magadihon sila sang common stand angot sa security situation sang probinsiya.
