Pagadagdagan sang notice of violation sang City Permit and Licensing Division ang tanan nga mga wala sang business permit sa Ciudad sang Bacolod. Ginpahayag ni Bacolod City Permits and Licensing Division Head Stella Rose Rayos, magapatigayon sila sang inspection sumugod Marso para e-tsyekyar kun may yara sang business permit ang tanan nga nagparegister sa ila opisina. Suno kay Rayos, prayoridad nga unahon sang inspection team ang mga negosyo sa bahin sang accommodations, schools, kag boarding houses. Ang nasambit nga inspection team ang pagalakipan sang mga katapo gikan sa Office of the Building Official, City Health, Bureau of Fire, kag Bacolod Environment and Natural Resources Office. Nahibaluan nga base sa pinakaulihi nga rekord, yara sa 18, 878 ang nakaregister sa Business One Stop Shop (BOSS) apang 8, 472 lamang ang may yara sang business permit.
