Ginpangbaklas na sang Commission on Elections (COMELEC) kaupod ang Department of Public Works and Highways (DPWH) kag PNP ang mga campaign posters sang mga National kag Party-list candidates kaina sang aga, Pebrero 11 sa dalan Araneta, Bacolod City.
Suno kay Provincial COMELEC Supervisor Atty. Ian Lee Ananoria, ang oplan baklas ang isa ka Nationwide activity sa diin ila ginapangkuha ang mga posters sa gwa sang common posters area. Ini ang may angut sa pag-umpisa sang 90-day Campaign Period sang mga National Candidates sini nga adlaw.
Paathag sini nga indi pa nila matandog ang mga posters sang mga magapadalagan diri sa lokal bangud makabig pa lang ang mga ini bilang aspirants kag indi pa matawag nga “candidates.” Apang, pwede man nila matandog ang mga nagatapik sa mga puno kag mga poste sang kuryente kun kinahanglan.
Suno naman kay Bacolod City Election Officer Atty. Revo Sorbito, masami sa sulod sang nga barangay nahamtang ang common poster area ukon ang lugar nga natalana pahamtangan sang mga campaign posters.
Dugang pa sini nga ang indi lang nila matandog amo ang mga posters sang mga National Candidates kag Party-list nga nagatapik sa mga private properties.
Panawagan sini sa mga local supporters nga pilion gid magsunod sa mga guidelines sang COMELEC agud indi man mabudlayan ang opisina sang pagpangbaklas.
Subong nga adlaw, maga-focus ang COMELEC Bacolod sa paglimpyo sang mga canpaign materials sa dalan Araneta.
