Ginbawian sang kabuhi ang isa ka encargado matapos nga ginluthang sa adlaw sang Valentine’s, Pebrero 14, pasado las-7 sang aga, sa bahin sang Hacienda San Isidro, Brgy. Bagtic sa ciudad sang Silay.
Ang biktima ang ginkilala nga si alias ‘Ricardo’, 63-anyos, residente sang Hacienda Bias 1, Brgy. Guimbalaon sa amo nga ciudad.
Ginpahayag ni Silay City Police Station Deputy Chief Police Major Sarah Villanueva, sa inisyal nga imbestigasyon sang kapulisan ang biktima ang naghalin sa ila puluy-an kapin las-6:20 sang aga agod magdul-ong sa iya nga bata sa Brgy. Kapitan Ramon sakay ang motorsiklo.
Sa pagbalik sang biktima pauli sa Brgy. Guimbalaon, ini ang ginpaarakan luthang sang wala pa matumod nga duha ka mga suspetsado.
Nakaagom sang tatlo ka igo sang bala ang biktima sa nagkalain-lain nga bahin sang iya lawas kag isa sa ulo nga gintunaan sa iya nga kamatayon
Blanko pa sa karun ang kapulisan natuhoy sa motibo sa pagluthang sang biktima bangod padayon ila imbestigasyon kag gina-alegar wala sang kontra si Ricardo suno sa pamilya.
Nagapatigayon sa karun sang hot pursuit operation ang kapulisan batok sa mga suspetsado.
