Nagtuga sang landslide kag baha sa pila ka porsyon sang ciudad sang San Carlos ang pagtupa sang mabaskog nga ulan kahapon nga adlaw sang Domingo.
Ginpahayag ni San Carlos DRRMO Head Joe Recalex Alingasa nga nagsugod ang ulan las-2:00, Domingo sang kaagahon, kun sa diin nag-eksperyensiya sang light to moderate rains sa city proper samtang heavy to torrential rains ukon tuman kakusog naman sa nabukid nga porsyon.
Isa ka pamilya nga may lima ka mga myembro ang nawad-an sang balay matapos ini nadalasa sang landslide sa Upper Eco-Translink Highway sa Barangay Rizal.
Nakaluwas sa peligro ang mga ini bangud sila ang nag-evacuate gilayon matapos namutikan ang pag-crack sang duta.
Samtang, nag-eksperyensiya naman sang baha ang Barangay 1 matapos nag-awas ang Palampas River kag subong man ang Barangay 5 kasunod sang pag-awas sang Ando-on Creek. Suno kay Alingasa, pareho nga nanubuan nga lugar ang duha ka barangay.
Nagdangat sa 45 ka pamilya ukon 180 ka mga indibidwal ang nabahaan sa Barangay 1 samtang 28 ka pamilya ukon 112 ka mga indibidwal ang nabahaan sa Barangay 5 ukon kabug-usan nga 292 ka tawo ang apektado sang baha.
Gilayon naman nga nagpauli ang mga residente matapos nagtahaw ang tubig.
