Siling nila kun gabusong ka, kaangay nga yara nalubong sa duta ang isa mo ka tiil kag ang pagbun-ag sang bata ang isa sa pinaka risgado nga butang, ilabi na kun kulang ini sang presensya sang eksperto.
Nakabati na kita sa mga istorya sang mga iloy nga nagbata sa balay, sa lying-in centers, ukon bisan sa mga panahon sang kalamidad, apang ang aton istorya karon amo ang parte sa iloy nga madinalag-on nga napagwa ang iya anak samtang yara sa kahawaan sakay sang eroplano.
Sa isa ka flight halin sa Riyadh, Saudi Arabia padulong sa Manila, daw kaangay nga nag-ulan ang swerte sa isa ka iloy nga nagbun-ag sang healthy baby boy.
Sa bulig sang isa ka pasahero nga midwife, duha ka nurses kag isa ka retired doctor, natigayon nga mapagwa ang baby boy.
Sa Facebook post nga gin-share sang aviation blogger nga si Mond Ortiz, upod sa mga crew sang Philippine Airlines Flight PR655 kag mga medical personnel, ginpahayag diri ang successful delivery sang iloy.
Ang baby ang ginhingadlan nga Khalid.
Pag-abot sa Manila, gilayon man nga ginhatagan sang nagakaigo nga medical support ang mag-iloy sa diin karon, yara na sila sa maayo nga kahimtangan.
