Padayon pa nga gina-usisa sa karon sang Moises Padilla PNP ang tiyo sang isa ka 3rd year student nga ginbawian sang kabuhi matapos maaksidente sakay sang motorsiklo.

Una na ginpahayag sang kapulisan nga base sa ila inisyal nga imbestigasyon, wala sila nagapati nga may nagsipa sa motor nga nagbutyog samtang sakay ang biktima si Deserie Tadena.

Madumduman nga una ginpahayag sang tiyo sang biktima nga si Joear Bajar nga nagapangihi siya sang tion nga hinali lang nagdulhog ang motorsiklo sakay ang biktima sa diin sang iya pagbalikid, nakita sini nga ginsipa sang driver sang isa ka naglabay nga blue nga motorsiklo ang ginasakyan nga motor sang iya hinablos.

Sa interview sang DYHB kay Moises Padilla Deputy Chief PLt. Arnulfo Robles, ginpahayag sini nga wala naga alalalangot ang pahayag ni Bajar.

Ila ginahulat sa karon nga mag-ako ini nga wala na sang iban pa nga imbolbado sa insidente.

Ini matapos pila ka mga witness ang nagasiling nga naaksidente lang gid ang motorsiklo nga gina-drive sini sa diin naga-angkas si Deserie.

Sa madumduman, nakaangkon sang severe head injury si Tadena matapos malampos ang ulo sini sa dalan tuga sang pagkatumba sang motor rason nga ginbawian ini sang kabuhi.

Nakaangkon naman sang gasgas sa lawas ang tiyo nga driver nga nahibaluan naka-inom sang makahulubog nga ilimnon antis natabo ang insidente.

Si Deserie ang naga-edad 21 -anyos kag naga eskwela bilang 3rd Year BS Elementary Education student sa Central Philippine State University.

Una na nagpanawagan sang hustisya ang amay ni Deserie sa kun sin-o man ang lalaki nga nagsipa sa motor nga ginasakyan sang iya anak nga magsungka na agud mahatagan sang hustisya ang pagtaliwan ni Deserie.

Sa karon, indi pa matumod sang kapulisan kun ano ang nagapugong sa tiyo nga magbulgar sang matuod-tuod nga natabo.

Pananglit mapamatud-an ang krimen kag mag disider ang pamilya ni Deserie magpasaka kaso, posible magpangatubang sang kaso nga reckless imprudence resulting to Homicide ang tiyo sang biktima.

Share this news

Leave a Reply

Your email address will not be published. Required fields are marked *