Nagpirma sang memorandum of agreement ang City Government sang Victorias upod sa Federation Internationale De Football Association (FIFA) kag Philippine Football Federation (PFF) angot sa pag-host sang labing-una nga FIFA Futsal Women’s World Cup.
Ang MOA signing ang ginhiwat sa Nature’s Village Resort sa Talisay City, Myerkules sang aga, sa tunga nanday Mayor Javier Miguel Benitez, PFF President John Anthony Gutierrez, PFF Grassroots Football Head David Javellana kag Victorias City Councilor Francis Frederick Palanca.
Ginpabutyag ni Mayor Javi Benitez ang tuman nga kalangkag sa pag-host sang ila nga ciudad sang labing-una nga Futsal Women’s World Cup sa bilog nga kalibutan nga gintalana sa Nobyembre 21 tubtob Disyembre 7.
Angot sini, igapa-renovate sang city government ang Victorias City Coliseum agud matupungan ang FIFA standards nga punduhan sang P162 million nga loan.
Nahibaluan nga kabug-usan nga 16 ka mga national futsal teams ang magakari sa Pilipinas, lakip na ang world number one nga Brazil kag number two nga Spain, kun sa diin walo diri ang magahampang sa Victorias City kag walo man sa PhilSports Arena sa Metro Manila.
