Nagpaguwa sang guidelines ang Department of Budget and Management para sa pag-establisar sang mga regional offices sang mga national government agencies sa idalom sang Negros Island Region.
Sa idalom sang Circular Letter No, 2025-3, ginpatpat sang DBM ang guidelines sang pagtukod sang mga opisina, pag-hire sang mga staff kag pag-alokar sang pundo agud masiguro ang matalunsay nga pagdumala sang NIR.
Nahibaluan nga sa idalom sang Section 4 sang Republic Act 12000 ukon NIR Act, ginamandu ang pagtukod sang regional office sang mga departamento ukon ahensiya sang gobyerno agud maimprobar ang serbisyo de gobyerno sa bag-ong tukod nga rehiyon.
Base sa NIR Act, sa Negros Occidental ipahamtang ang mga opisina para sa agriculture, land, peace and order, security kag governance samtang sa Negros Oriental naman ang mga departamento may kaangtanan sa human development, infrastructure kag industry and labor.
Ang pundo para sa matag-adlaw nga pagpadalagan kag subong man imprastraktura sang NIR sang magahalin sa naga-eksister nga budget sang natungdan nga mga ahensiya sa Region VI kag VII.
Nalakip man sa circular ang mga mekanismo sa pag-establisar sang organizational structure kag staffing pattern sang NIR offices lakip na ang transfer ukon detail sang mga personnel, designation sang interim heads kag procedures sa pagpuno sang mga posisyon apang bangud sang nagahilapit May 12 National and Local elections, ang paghulag sang mga personnel ang magatuman sa Omnibus Election Code.
Ang NIR Act, nga nagatingob sang Negros Occidental, Negros Oriental kag Siquijor bilang isa ka rehiyon, ang ginpasar bilang layi sadtong Hunyo 11, 2024 agud mapasanyog ang decentralized administration, mapabakod ang local autonomy kag mapadasig ang economic, cultural kag social development.
