Duha ka local partylist organizations sa Negros Occidental kag Iloilo ang nalakip sa 34 ka mga gindagagan sang Commission on Elections sang notice of violation bangud sang illegal campaign materials.
Ang Uswag Ilonggo Partylist nga nakabase sa Iloilo kag Abang Lingkod Partylist nga gikan naman diri sa Negros Occidental ang ginpadal-an sang notisya bangud sang pagpanapik sang campaign materialssa saguwa sang common poster area ukon may sala nga size ukon indi environmentally-friendly.
Ginpahayag ni Provincial Election Supervisor Atty. Ian Lee Ananoria nga resulta ini sang ginpatigayon nga Operation Baklas sang mga election officers kun sa diin ang mga may bayolasyon ang ginkuhaan sang picture antes ginpadal-an sang notice of violation paagi sa email.
Nagpamalibad naman si Ananoria sa paghatag sang dugang nga detalye apang ginkumpirmar nga may election officers sa probinsiya nga nagpadala sang report sa Comelec Central office kag nag-issue sang notice of violation.
Sila ang ginhatagan sang tatlo ka adlaw agud magsabat sa natungdan nga election officer ukon sa Comelec Law Department, depende kun sin-o ang nagpaguwa sang notice.
Kinahanglan man nga ipakakas ang illegal campaign materials apang kun mapaslawan, pasakaan sila sang kaso nga posible magresulta sa pagka-disqualify sa pagpasakop sa May 12 National and Local elections.
