Sin-o bala ang indi makibot kun nagapahimunong ka lang sa sulod balay kag may hinali lang nagdulog nga police patrol kag ginapangita ka? Kaangay sini ang natabo sa Wisconsin, USA sa diin wala gina ekspektar sang isa ka iloy nga pangitaon ini sang mga pulis bangud ginreport siya sang iya mismo nga anak. Ang nagtawag sa 911 amo ang iya apat ka tuig nga bata nga ginapadakop sia bangud nga wala niya ini ginhatagan sang ice cream. Ginpasulod sang iloy ang mga pulis kag ginpamatian ang pahayag sang bata kun ngaa nagtawag siya sa 911. Suno sa bata, ginapakamalaot niya ang iya iloy bangud nga wala sia sini ginhatagan sang ice cream gani dapat lang nga prisuhon ini. Pahayag naman sang iloy, nagbakal sia sang duha ka ice cream kag ginkaon niya ang isa. Sa pagdumdom sang bata, ang iya parte ang ginkaon sang iloy gani nagtawag sia sang 911. Bangud sini, nagkadlaw nalang ang mga nagresponde nga pulis. Sa baylo nga mangakig, gindayaw pa ang bata sa kaalam sini. Antes naghalin ang pulis, ginposasan ang iloy agud lang nga ma-satisfy ang bata. Pagkasunod nga adlaw, nagbalik ang mga pulis apang indi na posas ang dala kundi ang paborito nga ice cream sang bata nga may sprinkles.
