Ginkumpirmar ni Dr. Joey Villarosa, Negros Occidental Provincial Schools Division Medical Officer, nga nagdangat sa 20 ka mga estudyante sang Bubog Elementary School sa Talisay City ang naglain ang pamatyag bangud sang nakaon nga expired nga chocolates.
Ginpahayag ni Villarosa nga ang mga ini ang ginalakipan sang 15 ka grade 5 pupils, tatlo ka grade 4 pupils kag duha ka grade 3 pupils, nga lunsay gindala sang barangay vehicle sa Talisay City Health Office matapos nagsakit ang tiyan kag nagpalanuka.
Sa inisyal nga pagpangusisa, isa ka estudyante ang nagdala sang chocolate bars, nga ginapatihan imported, nga amo ang ginkaon sang nahilo nga mga kabataan.
Suno kay Villarosa, wala pa naestablisar kun ginbaligya ukon ginpanghatag sang amo nga bata ang mga tsokolate.
Sang gin-usisa ang wala pa mabuksan nga mga chocolate bars, nakit-an nga expired na ini kun sa diin September 17, 2024 pa ang expiry date.
Ginklaro naman ni Dr. Villarosa nga may polisa ang Department of Education angot sa ginabaligya nga pagkaon sa eskwelahan nga kinahanglan mabakal lamang sa school canteen.
Sa idalom sang pareho nga polisa, ginadumili ang carbonated kag high sugar content nga mga ilimnon kag kun selyado ang pagkaon, kinahanglan ini ang may Sangkap Pinoy seal
