Preparado na para magserbisyo sa publiko, ini ang ginpahayag ni Isabela Mayoralty aspirant Miguel Yulo sa DYHB Kilalahon Serye 2025 studio interview kaina sang aga, Marso 26,2025.
Suno kay Yulo, na-train siya sang iya amay nga si 5th District Congressman Dino Yulo sa pag serbisyo sa publiko.
Si Miguel ang nagserbe bilang chief of staff sang iya amay sa sulod sang tatlo na ka tuig kag karon, handa na ini sa mas dako nga responsibilidad.
Ginpanginwala man sini ang mga alegasyon nga wala siya nakatapos high school.
Nagapati man ini nga matuod, isa ka dako nga basehan ang educational attainment sang tawo nga nagakandidato, apang ang simpatiya kag serbisyo sa mga pumuluyo ang nagahalin sa personalidad sang isa ka nagapapili nga handa magpangalagad.
Suno pa kay Yulo, ang isa ka public servant ang dapat wala nagapabaya sa iya nasakpan ilabi na kun makapungko ini sa posisyon. Dapat alalangay lang kag may pag-ulikid sa gihapon.
Kun ngaa siya ang napilian updan sang iya grupo, simple lang ang sabat ni Miguel, ang taghipusuon sini sa pagserbisyo sa tawo ang nagapanguna kag luyag niya mag set sang bag-o nga standards para sa mga kaangay niya nga luyag magpangalagad sa banwa sang Isabela.
