Nagdangat sa kapin P16.6 million ang total sales ukon income sang 29th Panaad sa Negros Festival.
Sa ginpaguwa nga sales report sang Capitolio, yara sa P16,600,630.70 ang nangin income sang Panaad Festival kun sa diin ang pinakadaku ang gikan sa mga LGU pavilions nga yara sa P9,822,315.50.
Nahibaluan nga yara sa kapin P1.8 million ang sales sadtong Marso 24; P1.6 million sang Marso 25; P1.2 million sang Marso 26; P1.9 sang Marso 27; P2.2 million sang Marso 28; kag kapin P2.7 million sang Marso 29.
Pinakadaku nga sales ang na-record sa ulihi nga adlaw, Marso 30, nga nagdangat sa kapin P4.85 million.
Ang total sales sang 29th Panaad sa Negros Festival ang mas manubo kun ikumparar sang nagligad nga tuig.
Sadtong 2024, yara sa P19.2 million ang nangin kita sang Panaad Festival, nga mas manubo naman sang 20 percent ikumparar sadtong 2023 nga yara naman sa P23.6 million.
Angot sini, ginpabutyag ni Governor Bong Lacson nga ang pagnubo sa total sales sang ginabansagan nga “mother of all festivals in Negros Occidental” ang possible bangud may klase pa ang mga eskwelahan kag natabuan man nga nagsugod na ang campaign period para sa May 12 National and Local Elections.
Nahibaluan nga kinaandan nga sa bulan sang Abril ginahiwat ang Panaad Festival kun sa diin bakasyones na sang mga estudyante.
