Naglab-ot sa lima ka mga barangay sa ciudad sang La Carlota ang nangin apektado sang liwat nga paglupok sang Bulkan Kanlaon nga nagluntad pasado alas-5 sang aga, Abril 8, 2025.
Sa interview sang DYHB kay La Carlota City Mayor Rex Jalandoon, ginpahayag sini nga ang lima ka mga kabaranggayan amo ang Barangay Ara-al, San Miguel, La Granja, Cubay kag Haguimit, lakip man diri ang Barangay Yubo apang minor lamang suno kay Mayor Rex.
Suno sa alkalde, nangin daku nga pagpanghangkat ang kadamulon sang abo nga nagluntad sa lugar apang ginpahayag man sini nga naka-preposition ang ciudad sang mga facemask sa City Health kag sa mga barangay rasun sang gilayon nga pagpanghatag sini sa mga pumuluyo.
Sa pihak nga bahin, ginpahayag man ni Jalandoon nga suno sa water district, nasudlan sang asupre ang spring sa babaw nga bahin sang ciudad rasun nga nagka-problema sa supply sang tubig.
Pahayag sang alkalde, gilayon nga nagdeploy sang duha ka firetruck ang ciudad agud magresponde sa kakulang sang tubig kag mag-flushing sa dalan nga halos napuno na sang abo gikan sa bulkan.
Dugang pa sang alkalde nga nagtawag kag nagpangayo naman ini sang bulig gikan sa iban nga mga alkalde sang probinsya nga amo ang ciudad sang Bago, Victorias, Silay, Cadiz kag sa alkalde sang Murcia.
Ginpahayag man ni Jalandoon nga ginahimo sang lokal nga pamunuan sang La Carlota ang tanan nga mga tikang agud makadul-ong sang bulig kag gilayon nga mahatag ang mga kinahanglanon sang mga pumuluyo.