Nagdeploy sang 595 ka mga kapulisan ang Negros Occidental Police Provincial Office (NOCPPO) para sa OPLAN Summer Vacation (SUMVAC) 2025 nga ginlunsar agud masiguro ang seguridad sang mga domestic kag international tourists nga ginalauman magapadulong sa probinsya.
Ginagarantiya naman ni NOCPPO Provincial Director, PCOL Rainerio M. De Chavez ang seguridad sang mga pumuluyo sa tion sang malawig nga holiday period lakip na ang bakasyon kag ang pag-obserbar sang Semana Santa sumugod Abril 14 tubtob Abril 20, 2025.
Ang deployment suno sa NOCPPO ang magadugang sa regular nga pwersa sang kapulisan nga yara sa nagkalain-lain nga mga police stations nga magapadayon sang ila standard operations.
Yara sa kabug-usan nga 278 ka mga Police Assistance Desks (PADs) ang gin-establisar sa nagkalain-lain nga mga recreational areas subong man sa mga religious sites, terminals, ports kag sa iban pa nga mga lugar nga masami gina kadtuan sang pumuluyo.
Dugang pa, ang mga beat patroller kag mga undercover sang kapulisan ang iga-deploy man agud mapauswag ang coverage sang seguridad.
Sa bahin naman sang trapiko, ang mga road safety marshals kag mga traffic personnel ang igabutang sa mga mayor nga dalan kag iga-mobilize man ang pwersa sang pila ka mga force multipliers.
Nagapanugyan man ang kapulisan sa publiko nga magpabilin nga mangin vigilante sa palibot may angut sa nagahilapit nga Semana Santa kag malawig nga bakasyon.