Naglab-ot na sa 700 ka road safety stickers ang natapik sang Bacolod Traffic and Transport Management Department (BTTMD) sa mga pangpasahero nga salakyan sa ciudad.
Suno kay BTTMD Officer-in-Charge (OIC) Patrick Lacson, bisan naglab-ot na sa 700 ang natapikan, kulang man sagihapon ini bangud nga yara sa 1,200 ka mga salakyan ang ginalauman nga matapikan base sa ginpasa nga listahan sa ila.
Ginpahayag ni Lacson nga wala nila gina-pressure ang operators kag ginaaku sini nga madugay ang ila proseso sa pagtsekar sang mga papeles.
Kabalo man ini nga dako ang halit sa operasyon kag pangabuhian sang mga yara sa transportasyon.
Nagapangayo naman sang pasaylo kag pag-inchindi ang BTTMD sa mga naapektuhan.
Samtang, nagpadayon sagihapon ang pagpangtapik sang BTTMD sang road safety stickers sa mga salakyan kada sabado sa likod sang Bacolod City Government Center.