Padayon ang pagdul-ong sang bulig sang probinsya sang Negros Occidental sa mga residente nga naapektuhan sang paglupok sang bulkan Kanlaon tinalikdan nga April 8,2025.
Sa interview sang DYHB kay Negros Occidental Administrator Atty. Rayfrando Diaz II, iya ginpahayag nga ginpasiguro na sang probinsya nga may matinlo nga suplay sang tubig ang mga pumuluyo sa banwa sang La Castellana amo kun ngaa naka-standby lang didto ang 10,000 liters sang tanker with filtration system.
Samtang yara naman sa La Carlota City ang 5,000 liters nga water filtration tanker.
Dugang pa, sila ang nag-provide man sang gasolina para sa mga private volunteers nga nagadul-ong sang tubig nga ginagamit sa flushing operations kag pondo nga tubig nga mausar sang mga tawo.
Magluwas sini, padayon man nga nagaserbe sang hot meals ang mga Job Order casuals sang Capitol para sa mga evacuees.
Nagalaum si Diaz nga pagkatapos sang election banning, mas madamo pa sang mga magaabot nga bulig kag assistance halin sa National Government para sa mga apektado nga residente.
Ginpakigbahin man sini nga malipayon sila nga nahikot na sang Bago City ang Permanent Evacuation Center sini.
Samtang, ila naman ginahulat ang banwa sang La Castellanana nga magpasa sang isa pa ka lugar nga pahamtangan sang relocation site matapos nga wala gin-aprubahan sang Department of Environment and Natural Resources (DENR) ang ila una gin-propose bangud malapit ini sa Sanitary Landfill.
Suno kay Diaz, handa na nga magbakal ang banwa sang P14 million nga balor sang materials para sa relocation area.