Ginareklamo sang isa ka pasahero ang ila nasakyan nga taxi diri sa ciudad sang Bacolod nga ginaalegar indi magdul-ong sa ila bangud lapit lang ang ila kadtuan.
Sa social media post ni Princess, halin sila sa isa ka Mall sa Bacolod kag nagsakay sa taxi padulong 888.
Suno kay Princess ginhambalan sila sang driver nga “Ay 888 man lang kamo gali ya?” “Te ma metro pa ko?”
Diri ginpamangkot siya sang iloy ni Princess nga kun pila ang iya sukot kun indi na mag metro.
Ginsabat man ini sang driver nga P100. Diri nagsugot man ang mag-iloy.
Ginaalegar nga samtang nagabiyahe, nagakumod pa ang driver bangud nga 888 lang man mapadul-ong ang mga pasahero.
Ginparangka man siya sang mga pasehero nga tani wala nalang siya nagsugot magdul-ong kun mag kumod-kumod lang man ini.
Samtang nagabiyahe, isa ka bes ginhikap sang isa ka bata ng upod nila ni Princess ang aircon sa atubang kag diri ginhambal sang driver nga “indi pag hmpangi kay indi kabayad ang plete niyo kung maguba na.”
Ginpahayag ni Princess sa DYHB nga ila ini gin-post sa social media agud mangin aware man ang mga pasahero.