Sa karon nga panahon, sin-o bala ang wala gana magpangape? Kahibalo na ang tanan nga ang presyo sang kape ang nagabase sa kalidad kag variety sini. Kag handum gid sang tagsa ka coffee lover nga makatilaw sang malahalon nga sahi sang kape. Pero nakahibalo ka bala nga ang industriya sang kape sa Vietnam subong naga-experyensya sang isa ka dako nga pag-uswag sa diin ang mga global roasters ang nagapangita sang suplay halin sa nasambit nga pungsod. Sang una, ang Robusta nga kape halin sa Vietnam kilala tungod sa kabarato sini, pero subong, ang Robusta na ang pinakamahal sa bug-os nga kalibutan. Sa pagsugod sang 2025, ang Central Highlands — nga amo ang kapital sang kape sa Vietnam — yara sa tunga sang pinaka-masako nga tiun sang ani. Ang presyo sang green coffee beans nagapabilin sa all-time high nga $4.80 tubtob $4.87 ukon P280 ang kada kilo. Kag ang mga mangunguma ang sarang maka ginansya, sang tubtob $3.24 ukon P184 kada kilo. Sa Central America Highlands, ginakumparar na ang kape sa ATM bangud sa padayon nga dalagan sang kwarta para sa mga mangunguma. Sa international nga merkado, ang Robusta sang Vietnam kilala na subong sa iya manamit pero maisog nga sabor, rason nga ginapangita ini sang mga business owner. Sa pihak nga bahin, base sa datus sang Ministry of Agriculture and Rural Development, may 718,000 ka ektarya sang kapihan sa Vietnam sang 2024, nga nagaproduce sang 1.95 milyones ka tonelada. Sa sulod sang madamo nga tuig, ang kape nangin isa ka importante nga pananum sa industriya sang agrikultura, kag nagahatag kabuhi sa linibo ka pamilya nga mangunguma. Subong, ang Vietnam isa na sa top 5 nga mga producer kag exporter sang kape sa kalibutan, kag amo ang numero uno sa Robusta production.
