Ginaproseso sa karun ang piyansa sang kampo sang Indian national nga nangsaruso sa mga nagaprosesyon sang tinalikdan nga Biyernes Santo, Abril 18, sa Purok 20 Barangay Alangilan sa ciudad sang Bacolod.
Ginkilala ang driver sang toyota innova nga nakabunggo sa mga nagaprosesyon nga si Jagpret Singh, 37-anyos, kag residente sang Brgy. Villamonte.
Madumduman, nagresulta ang aksidente sang kamatayon sang tatlo ka indibidwal kag pagka-injured sang 17 ka iban pa.
Ginpahayag ni Police Lt. Col. Ramel Sarona, head sang Bacolod City Police Office- Traffic Management Unit, 17 ka mga complainant ang yara kahapon sa Prosecutor’s office agod matigayon nga mapasaka ang kaso batok kay Singh nga reckless imprudence resulting in multiple homecide, multiple physical injuries , damage to properties kag RA 10586 ukon Anti-Drunk and Drugged Driving Act 2013.
Apang suno kay Sarona, ginaproseso sa karun sang abogado sang suspek ang piyansa para sa temporaryo nga kahilwayan ni Singh.
Sa 17 ka mga napilasan sa amo nga aksidente, walo pa ka indibidwal ang nagapabilin sa ospital kag yara na sa estable nga kondisyon.