Nagdangat na sa masobra 40 ang nautas ang kabuhi matapos ang paglupok nga nagtuga sang sunog sa Bandar Abbas sa pinakadako nga pantalan sa pungsod Iran. Masobra 1,200 man ka indibidwal ang nasamaran sa amo nga insidente. Ang natabo nga sunog sa Shahid Rajaee nga bahin sang pantalan, ang ginahamtangan sang pinakadako nga container hub sang pungsod. Nagresulta ang paglupok sang pagkaguba sang mga bintana nga nahamtang pila ka kilometro ang kalayuon kun sa diin nagluntad ang insidente, pagkagisi sang mga metal strips sang mga shipping containers kag pagkaguba sang mga produkto nga yara sa sulod sini. Kasunod sang insidente, nagmando si Iranian President Masoud Pezeshkian nga magpatigayon sang imbestigasyon angot sa ginhalinan sang paglupok.
