Magapadala sang 310 ka mga police personnel ang Bacolod City Police Office sa probinsiya sang Negros Oriental sa maabot nga eleksyon.
Ginpahayag ni Commission on Elections Negros Island Region (Comelec-NIR) Regional Executive Director Atty. Lionel Marco Castillano nga nahambalan sa ginpatigayon nga Regional Joint Security Control Center (RJSCC) Meeting sa NORPPO Headquarters sa Sibulan kahapon ang bahin sa kakulang sa police personnel sa Negros Oriental Police Provincial Office para sa pagbantay sang serguridad sa adlaw sang eleksyon .
Ginpahayag nga sobra ang kapulisan sa Bacolod City bangud may kapin 1,000 ka mga police personnel sa BCPO samtang pipila lamang ang mga voting centers diri.
Magasugod ang deployment tatlo ka adlaw antes eleksyon kag magabalik man sila pagkatapos sang piniliay.
Suno kay Castillano, bentaha nga na-establisar na ang Police Regional Office sa NIR bangud madasig ang deployment agud mahimun-an ang kakulang sang personnel sa sulod sang rehiyon.
Ginpasiguro sang regional election director ang mga pumuluyo sa ciudad sang Bacolod nga indi maapektuhan ang kalinong kag katawhayan sa ciudad bangud sang amo nga deployment.