Nagtuyo sa pag-file sang disqualification case batok kay incumbent Cauayan municipal Mayor John Rey Tabujara ang kasumpong sini sa Mayo 12 nga piniliay nga si Jurry Nabaja.
Mayo 6, Martes sang aga, nagpadulong sa Comelec Provincial Office si Nabaja dala ang mga dokumento kag tatlo ka mga testigo sa reklamo sini batok kay Tabujara.
Nagapati si Nabaja nga my paglapas sa layi si Mayor Tabujara sang nagtambong sila sang iya utod sa pagpanagtag sang ayuda sa mga senior citizens sa isa ka programa nga ginhiwat sa Cauayan Arts Center sadtong Abril 28.
Suno kay Nabaja, sa idalom sang Comelec Resolution 11104 ukon Abuse of State Resources ginadumilian ang mga incumbent government officials nga magtambong sa kaangay nga aktibidad.
Natabuan nga yara si Comelec-NIR Assistant Regional Election Director Jossil Macute kag ginpanugyanan sini si Nabaja nga i-file ang reklamo sa Committee on Kontra Bigay agud maaktuhan.