May person of interest na ang Murcia Municipal Police Station sa nagluthang sa tatlo ka mga miyembro sang pamilya Celeyas sa Sitio Guinam-an, Barangay Buenavista, pasado las-7 sang gab-i, Mayo 1.
Ang mga biktima ang ginkilala nga sanday Nelde Celayes, amay, 59-anyos; Josephine Celayes, iloy, 60-anyos; kag ikatatlo sa apat ka bata sini nga si Juvy Celayes, 33-anyos.
Ginpahayag ni Police Major Sherwin Fernandez, hepe sa Murcia MPS, may person of interest na ang kapulisan angot sa likod sang krimen nga pagpangluthang sa mag-asawa kag isa sa mga bata sang mga ini.
Madamo sang anggulo nga ginalantaw ang Murcia MPS angot sa motibo sang krimen, apang isa diri amo ang land conflict ukon problema sa duta.
Una na nga ginsiling ni Fernandez nga ginabulubanta yara sa kapin duha ka suspetsado ang sa pagpangluthang.
Madumduman, nasapwan sang isa ka residente sa lugar nga manag-ob kuntani sa bubon sang Mayo 2, ang bangkay ni Juvy nga yara sa kilid sang alagyan, kag didto nadiskubrihan man ang mag-asawa nga wala naman sang kabuhi.