Desidido magpasaka sang reklamo ang bana sang nurse nga nagtaliwan matapos mabungguan kag matapakan sang duha ka mga salakyan sa Purok Proper North, Brgy. Taloc syudad sang Bago, gab-i sang Hunyo 1.
Ang biktima ginkilala sa kay Maria Angela Buendia, 36-anyos, nagabusong sang anom ka bulan nga bata nga lalaki kag residente sang nasambit nga lugar.
Samtang, ginkilala ang mga driver sang salakyan nga nakabunggo sa biktima kanday Philipp Jansen Cantiller, 30-anyos, driver sang Multi Purpose Vehicle (MPV) kag residente sang Deca Homes Subdivision, Brgy. Cabug, Bacolod City samtang ang driver sang Subcompact sedan nga si Salvador Castro, 59-anyos kag residente sang Brgy. Crossing, Pulupandan.
Sa interview sang DYHB kay Bago City PNP Officer In Charge, Police Lieutenant Colonel Ariel Pico ginpahayag sini nga may mga schedule ang biktima nga gab-ihan ang duty sa isa ka rural health unit sa Valladolid kag sang gab-i sang insidente, padulong na kuntani ang biktima sa ulubrahan apang sang iya pagtabok sa pedestrian lane didto na siya nabungguan.
Dugang pa ni Pico, papuli na kuntani si Cantiller kag may ginasundan nga motor ugaling lang indi klaro sa windshield sang iya salakyan nga may tawo nga nagtabok sa rason nga tinted ini.
Diri nabungguan si Buendia kag bangud sang makusog nga impact, nagtabog ini sa pihak nga lane kag didto siya nalapakan sang salakyan nga ginamaneho ni Castro nga papuli na kun tani sa banwa sang Pulupandan.
Bangud sang paglapak sang salakyan, nagwa gid ang anum ka bulan nga lapsag sa tiyan sang biktima.
Magapangatubang sang kaso nga reckless imprudence resulting to homecide ang duha ka mga drivers nga karon nahunong sa Bago City PNP.