Isa ka immediate concern sa karon para sa mga Local Government Unit (LGU) ang pagsaylo sang mga evacuees nga karon nagapabilin pa sa mga classrooms karon nga magabukas na ang school year 2025-2026.
Sa interview sang DYHB kay Office of the Civil Defense- Negros Island Region (OCD-NIR) Director Donato Sermeno, ginpahayag sini nga nag-request na ang Department of Education (DepEd) sa ila nga kun mahimo, i-vacate na ang classrooms.
Sa ini nga mga tinion, yara pa sa 2,448 ka mga pamilya ukon masobra 7,000 ka mga indibidwal ang nagapabilin sa mga evacuation centers sa Negros Occidental kag Negros Oriental, pinakadamo diri amo ang banwa sang La Castellana.
Dugang pa sini nga kun ma-downgrade sa Alert Level 2 ang bulkan Kanlaon, maga-una balik sa ila mga puluy-an ang mga residente nga nagapuyo sa 6 km danger zone.
Samtang ang mga naga-istar naman sa 4km danger zone ang indi na pagtugutan pa makabalik bangud una sa tanan, dapat wala gid man sang may makasulod dira.
Paathag sang OCD nga ang desisyon sa pag-downgrade sang alert level kag ang paghatag sang abiso sa kun sin-o ang makabalik kag indi sa ila tagsa ka mga puluy-an ang nagadepende sa Phivolcs.