Natalana nga patigayunon bwas nga adlaw, Hunyo 5 ang rally protest kag untat biyahe sang pila ka mga transport groups sa ciudad sang Bacolod.
Una na ginpahayag ni Bacolod Aliance of Commuters Operators and Drivers Inc. (BACOD) / Manibela President Rudy Catedral, nga magaupod sa nasambit nga rally ang majority sang mga drivers kag operators sa idalom sang BACOD.
Nahibaluan nga maga-umpisa alas-6 sang aga ang nasambit nga rally kag untat byahe kag magalawig tubtob alas-10 sang gab-I nga pagahiwaton sa idalum sang flyover sa Barangay Bata kag Magsaysay.
Nagapati ang grupo nga kun mag-untat biyahe sila, mabatyagan gid sang mga commuters kag magapabutyag sang isa ka pamatuod nga kulang pa ang pwersa sang mga modern jeep sa ciudad.
Suno kay Catedral, indi pa sa karon ang tion para i-phaseout sila sa mga dalanon kag ang dapat himuon sang mga yara sa pwesto amo ang tugutan sila nga maka-renew sang ila mga prangkisa.
Dugang pa, wala ini nagapati sa panindugan sang Land Transportation Franchising and Regulatory Board (LTFRB) nga yara na sa 90% ang modern jeeps sa Bacolod bangud nga indi man ini mabatyagan sang mga commuters kag wala man sila sang datus nga ipakita sa pagpamatuod sini.
[Photo from Rudy Catedral Facebook]