PROVINCIAL CAPITOL – Magapatuman sang shifting ukon scheduling sa paggamit sang mga classrooms sa mga eskwelahan nga ginhimo nga evacuation centers sang mga internally-displaced persons sa mga lugar nga apektado sang paglupok sang Bulkan Kanlaon.
Ginpahayag ni Department of Education Negros Occidental Division Ian Arnold Arnaez nga nagasugod na sa karon ang enrolment sa mga public schools kag sa mga lugar malapit sa Bulkan Kanlaon, particular sa La Castellana, ini ang mangin basehan sa kadamuon sang learning spaces nga ila kinahanglanon sa pagbukas sang klase sa Hunyo 16.
Sang nagligad nga tuig, may mga classrooms sa host school ukon evacuation centers nga gintigana agud hiwatan sang klase apang indi ini bastante agud maakomodar ang mga estudyante sang amo nga mga eskwelahan kag subong man sang kabataan nga evacuees.
Sa sini nagpatuman sang shifting kun sa diin ang kada grade level ang may isa ka adlaw agud mag-face-to-face nga klase samtang ang pagtuon sang mga estudyante sa nabilin nga inadlaw ang paagi sa modules ukon distance learning.
Suno kay Arnaez, ang Office of the Civil Defense ang nagapadala sang mga tents agud mangin alternative learning spaces apang aminado siya nga indi ini conducive sa pagtuon sang mga estudyante.