“We Made It.” Ini ang nangin pahayag sang triplets nga Jalasco matapos nga naka-graduate ang mga ini tinalikdan nga June 18,2025 sa kurso nga Bachelor of Science in Information Technology (BSIT) sa Carlos Hilado Memorial State University (CHMSU)- Talisay Campus. Malipayon ang triplets nga sanday John Carlo, John Paul, kag John Christian Jalasco sang Barangay Cudangdang, EB Magalona bangud nga sa pihak sang ila naagyan nga kabudlayan sa kabuhi, natigayon nga maka-graduate ang mga ini sa ila Bachelor’s Degree. Sa interview sang DYHB kay John Christian, ginpahayag sini nga nagtaliwan ang ila iloy sang ginbun-ag sila samtang ginbawian naman sang kabuhi ang ila amay sang 2015 bangud sang leptospirosis. Agud makapadayon sa pag-eskwela, sila ang ginbuligan sang ila mga tiya, tiyo, lolo kag lola tubtob sa makatapos sila sa kolehiyo. Pahayag ni Christian nga mabudlay para sa ila ang magpadayon sa pag-eskwela sa kolehiyo nga wala sa ila tupad ang ila mga ginikanan apang dako ang ila pagpasalamat sa mga tawo nga nag-atipan kag nagsuporta sa ila. “We graduated not just a student, but as someone who kept showing up, even when it was hard, this one is for the younger me who never gave up,” pahayag pa sini. Dugang pa ni Christian nga ila gina alay ang ila nga diploma sa ila mga ginikanan kag sa mga tawo nga nagpati sa ila.
