Nagpakigbahin ang mga katapo sang United States Army kaupod ang mga katapo sang Armed Forces of the Philippines (AFP) kag Philippine Coast Guard (PCG) sa tuigan nga aktibidad sang Department of Education (DepEd) may angut sa preparasyon para sa liwat nga pagbukas sang klase.
Ginpahayag ni Acting Chief of the Joint U.S. Military Assistance Group Philippines, Lieutenant Colonel Adam Chu nga ginakalipay sang mga ini ang pag-upod sa AFP kag PCG sa pagsuporta kag pagbulig sa mga eskwelahan sa pag-preparar sang mga classrooms sa opisyal nga pagbalik eskwela sang mga estudyante.
Nagbulig ang mga ini sa pagpaninlo, pagdekorar kag pagkay-o sang pila ka mga pasilidad sa lima ka mga eskwelahan nga amo ang Malapandeg Elementary School, Guilingan Elementary School, Tarumpitao Point Elementary School, Rizal Central School, kag Jose P. Rizal National High School sa Palawan.
Nagpahayag man sang iya pag-aprisyar si DepEd Officer-in-Charge Undersecretary for Operations, Malcolm S. Garma sa serbisyo nga gindul-ong sang mga katapo sang US Army, Philippine Army kag Philippine Coast Guard .
Suno kay Garma, ang mga estudyante amo ang palaabuton sang pungsod kag kun ginabuligan sila, ginatukod man ang kalinong kag kauswagan para sa ila.
Nahibalu-an nga tagsa ka tuig ang Deped sa Pilipinas ang nagapatigayon sang isa ka semana nga preparasyon sang tagsa ka mga eskwelahan nga ginalakipan sang pagpaninlo kag bayanihan sang mga estudyante kag manunudlo lakip na ang mga ginikanan, stakeholders, local government units, kag pila ka mga pribado nga mga kompaniya.