PROVINCIAL CAPITOL – Ginatinguhaan ni Mayor Raymund Tongson nga makapatuman sang dalagkuan nga mga proyekto sa ciudad sang Himamaylan sa ikatatlo kag ulihi sini nga termino.
Suno sa alkalde, ginahimo sini ang tanan agud ma-maximize ang iya nga output sa masunod nga tatlo katuig kun sa diin ginatinguhaan sini nga makakuha sang dugang nga pundo gikan sa national government.
Magluwas sa regular nga mga proyekto, plano ni Mayor Tongson nga makapatuman sang “very big projects” kaangay sang pagpatukod sang coliseum kag auditorium samtang nagapadayon man ang pagtukod sang ila nga pantalan nga ginalantaw makaakomodar na sang RORO vessels antes matapos ang tuig.
Plano man nga magpatukod sang tunnel padulong sa Tayasan, Negros Oriental agud mas mapadasig ang pagbiyahe sa Carabalan-Tayasan Road.
Isa ka international company ang mangin partner sang Himamaylan City Government sa pagpatukod sang balor P12 billion nga tunnel.
Nakapakighinun-anon na si Tongson sa NEDA kag DPWH para sini nga proyekto.
Samtang, ginpabugal ni Tongson nga ginalantaw ang 15% nga pagsaka sang ila nga local income nga ginalauman magalab-ot sa kapin P1.420 billion.