PROVINCIAL CAPITOL – Pabalikon sa shelter camps ang mga evacuees sa banwa sang La Castellana nga nagpalagyo sini nga aga.
Ginkumpirmar ni Mayor Rhummyla Nicor-Mangilimutan nga nakabaton ini sang report nga may mga internally-displaced persons nga nagmato-mato sa pagpauli sa Barangay Cabagna-an.
Nahibaluan nga may iban nga nagpatigayon pa sang Facebook live nga ginakabig nga bawal.
Suno sa alkalde, isa ka truck ang mga evacuees nga nagpauli apang wala pa matumod ang eksakto nga kadamuon.
Base sa video nga gin-post ni Jerryku Aldea nga magapauli sila bangud nagaantos sila sa temporary shelter kun sa diin exposed sila sa init kag ulan kag nagatulo pa ang ila nga tents. Dugang pa sini, ginpabay-an sila kaangay sang mga sapat.
Gilayon naman nga magapakigsapol ang alkalde sa ila nga Incident Management Team (IMT).
Nahibaluan nga wala na nagbalik si Mangilimutan sa mass oath-taking sang 5th District officials sa Moises Padilla bangud sang hitabo.