Nagdangat sa kapin P3 million ang estimated nga damage sa nagluntad nga sunog sa Turquoise street, City Heights, Barangay Taculing, Bacolod City kaina sang kaagahon, June 30, 2025.
Sa interview sang DYHB kay Bureau of Fire Protection (BFP) Bacolod FSupt. Jenny Mae Masip, ginpahayag sini nga nagatakos 200 square meter kag may duha ka panalgan ang balay.
Iya man ginkumpirma nga duha ka mag-asawa nga senior citizen ang ginbawian sang kabuhi matapos nga na-trap ang mga ini sa sulod balay.
Paathag pa sini nga ang lalaki nga senior citizen ang bed ridden na samtang ang asawa naman sini ang sa second floor na gatulog.
Sang na-fire out na ang kalayo, nasapwan nga yara sa dining room ang asawa, isa ka posibilidad nga nagtinguha pa ini kun tani nga maka gwa sa balay.
Ugaling lang bangud nga napalibutan sang grills ang mga bintana, naayawan na ang mga ini nga makagwa.
Sa karon, padayon pa nga gina-imbestigahan sang BFP ang gintunaan sang sunog.