Nag-atubang na sa mga katapo sang La Castellana Incident Management Team (IMT) ang persona nga gina-alegar nagsapol kag nagkumbinsi sa mga Internally Displaced Person (IDP) ukon mga Evacuees sang Barangay Cabagnaan banwa sang La Castellana nga magpauli balik sa ila mga puluy-an.
Ini ang sandig sa impormasyon gikan sa Arangka La Castellana nga nagaserbe bilang official facebook page sang banwa.
Base sa post, nagpangayo sang pasaylo ang gina-alegar persona nga naghaylo sa mga IDP’S para maghimo sang tikang nga wala sang pahanugot gikan sa proper authorities kag sang Lokal nga pamunuan sang La Castellana.
Madumduman nga natabo ang pagpuli sang mga evacuees kahapon, Hunyo 30 nga ginalakipan sang 33 ka mga pamilya ukon 89 ka mga indibidwal.
Subong nga gab-i, Hulyo 1, pinaagi sa pagsugat sang mga katapo sang La Castellana DRRM, may pila na sa mga evacuees ang nagbalik na sa ila natungdan nga Evacuation Centers.
Samtang, ang nabilin pa nga mga IDPs sa Barangay Cabagnaan ang pagasugaton naman bwas nga adlaw.
Sa pihak nga bahin ang persona naman nga nag-post sa Social Media sang video samtang nagapauli ang mga IDP’S ang wala pa nag-atubang sa Incident Management Team apisar nga ini ang ginpangita sang Punong Barangay sang Cabagnaan.
Una na ginpahayag ni Police Major Rhojn Darrel Nigos, head sang IMT nga miscommunication lamang ang impormasyon angot sa pagbalik sang pila ka mga IDPs sa ila puluy-an bangod apat sa 37 ka pamilya ang nagbalik na sa evacuation center nga nahamtang sa La Castellana National High School- Senior High.
Ginklaro ni Nigos nga padayon nga ginapatuman ang window visit sa sulod sang 6km extended danger zone sa oras nga las-6 sang aga tubtob las-4 sang hapon, rason nga pila ka pamilya ang gilayon nga nagbalik man sa evacuation center.