Ginbawian sang kabuhi ang isa ka tricycle driver matapos ginluthang sang tatlo ka wala pa makilal-an nga mga suspetsado sa iya mismo nga balay sa Crossing Bairan, Barangay General Luna, banwa sang Toboso, pasado alas-5:45 kaina sang aga Hulyo 1, 2025.
Ginkilala ang biktima nga si Alyas Enrique, 64-anyos kag residente sang nasambit nga lugar.
Base sa report sang Toboso Municipal Police Station, yara sa iya balay ang biktima sang hinali lang nagsulod ang tatlo ka wala pa makilalal-an nga mga lalaki nga may dala sang nagkalain-lain nga kalibre sang armas kag ginluthang ang biktima sang makapila ka beses.
Naigo ang biktima sa nagkalain-lain nga bahin sang iya lawas nga nagresulta sang iya gilayon nga pagtaliwan.
Madasig naman nga nagpalagyo ang mga suspetsado padulong sa nabukid nga lugar sa Sitio Bairan, matapos ang insidente.
Narekober sang kapulisan sa crime scene ang anum ka mga ginpalupok nga cartridges sang calibre 9mm.
Sa karon padayun pa nga ginpatigayon sang Toboso PNP ang imbestigasyon may angut sa nagluntad nga pagpangluthang.
[Photos from Toboso MPS]