Nasapwan nga wala na sang kabuhi ang isa ka British National sa atubangan sang isa ka sari sari store sa Purok Katilingban, Barangay Salong, ciudad sang Kabankalan, alas-6:30 kaina sang aga, Hulyo 1, 2025.
Ang biktima ginkilala nga si Adrian Gregory Griffiths, 64-anyos kag temporaryo nga nagatinir sa VAWC office sang nasambit nga barangay.
Base sa report sang Kabankalan City Component Police Station, nakabaton ang kapulisan sang phone call gikan sa Punong Barangay nga nakita ang lawas sang wala na kabuhi nga persona sa atubangan sang iya sari sari store.
Sandig sa imbestigasyon sang kapulisan, ginpahayag sang mamumugon nga si Marlon Omero, nga pasado alas-2 sang hapon tinalikdan nga Hunyo 30, nagpalapit ang biktima sa iya kag nagpangayo sang pagkaon kag ini ang ginhatagan man.
Suno kay Omero, matapos maghatag sang pagkaon kag makita nga nagakaon ang biktima, naghalin na ini sa lugar.
Pasado alas-8 sang gab-i sa amo nga adlaw, nag-inum inum si Omero kaupod ang iya mga abyan sa nasambit nga sari sari store kag liwat naman nga nag-abot ang biktima kag nag-upod sa ila kag alas-10 sang gab-i, nagdesisyon ang mga ini nga magpauli na apang ang biktima ang nagpabilin kag nagpadayun sa pag-inum.
Pagligad sang amo nga gab-i, pasado alas-6:30 sang aga, Hulyo 1m sang si Gerard Tronco ang magabukas na kuntani sang sari sari kag didto nakita ang biktima nga nagahamyangon na sa semento.
Gilayon naman nga gindala ang biktima sa Kabankalan City District Hospital apang ini ang gindeklalar nga dead on arrival.
Nagapati naman ang kapulisan nga wala sang foul play nga nagluntad.
Ginpahayag man sang Barangay Chairman nga wala sang puluy-an ang biktima kag halos tatlo na ka tuig nga nagatinir sa VAWC office sang Barangay.