PROVINCIAL CAPITOL – Gin-inagurahan ang bag-o nga campus sang Negros Occidental Language and Information Technology Center (NOLITC) sa Barangay Matab-ang, Talisay City kaina sang aga.
Ang kahiwatan ang ginpangunahan nanday Governor Bong Lacson kag Vice-Governor Joeben Alonso upod sa mga opisyal kag tiglawas sang provincial kag national governments subong man academe kag pribado nga mga kompaniya.
Nahamtang sa NOLITC Talisay Campus ang isa ka two-storey building kag dormitoryo. Ini ang pinakabag-o nga innovation hub nga magabulig sa mga kinahanglanon sang mga industriya, sector sang edukasyon kag sang komunidad.
Nahibaluan nga ang NOLITC ang isa ka registered kag accredited nga technical-vocation school nga ginapanag-iyahan kag ginadumala sang Provincial Government, nga nagatutok sa information and communications technology kag subong man language sectors.