Wala pa sang kaso nga may ginpasaka batok sa driver sang mini dumptruck nga nagtakilid sa dalan sakop sang barangay Guimbalaon, Silay City tinalikdan nga June 27,2025 sa diin pito ka mga tawo ang ginbawian sang kabuhi samtang kapin 16 naman ang pilason.
Base sa report sang Silay City PNP, wala pa sang pamilya nga nagpahayag nga plano magpasaka sang kaso sa nasambit nga driver.
Ginapaabot naman nga maga-submit sang report ang isa ka expert mechanic nga nang-usisa sa mini dumptruck para matumod kun ano ang nangin kabangdanan sang aksidente.
Nahibaluan nga nakagwa na sa ospital ang driver nga na-confine sa ospital bangud sang naagum sini nga samad sa lawas tuga sang aksidente.
Samtang, siyam ka iban pa nga mga pilason nga pasahero ang nagapabilin sa ospital diri sa Bacolod kag isa naman sa Provincial Hospital sa Silay City.
Madumduman nga kapin 24 ka mga City hall employees ang sakay sang mini dumptruck matapos ini nagpatigayon sang tree planting activity sa Patag, Silay City apang sa ila pagdulhog sa bahin sang Barangay Guimbala-on, ginaalegar nadulaan sang preno ang salakyan kag agud indi ini mahulog sa pil-as, ginbunggo sang driver ang salakyan sa isa ka concrete barrier. Bangud sang impact, pila sa mga pasahero ang nagtabog.