PROVINCIAL CAPITOL – Magasandig sa AMIGO Framework ang pagdumala ni Mayor Miguel Angelo Yulo bilang bag-ong pungko nga alkalde sang banwa sang Isabela.
Sa iya nga inaugural speech, Lunes sang aga, ginpahayag ni Mayor Yulo nga ang acronym nga AMIGO ang nagatindog sa mga tinaga nga Agriculture, Medical, Infrastructure, Gwapo nga kalidad sang edukasyon, kag Openness of offices.
Suno kay Mayor Miguel, sila ang maga-invest sa agrikultura agud maduso ang kaayuhan sang mga mangunguma nga amo ang sa likod sang food security sang ila nga banwa; handum man nila ang paghatag sang accessible kag affordable nga healthcare services para sa tanan nga Isabeleños; magapaobra sang kongkreto nga dalan, magapainstolar sang madamo nga streetlights, magapatukod sang mga eskwelahan kag magatinguha nga mapasugaan bisan ang pinakamalayo nga mga sitio; pag-invest sa edukasyon sang mga pamatan-on paagi sa paghatag sang suporta halin sa ila pagtuon tubtob sa pag-review para sa mga licensure examinations; kag pagbukas sang mga talatapan sang munisipyo.
Ginpasiguro ni Mayor Yulo nga bukas ang mga opisina, mangin transparent ang budget kag mangin consultative ang pagdihon sang mga desisyon.
Ginpabutyag sini nga ang AMIGO Framework ang indi lamang isa ka roadmap apang isa ka promisa para sa sinsero, tampad kag liderato nga para sa tanan.