Na-intercept sang Bureau of Custom (BOC) ang kapin 30 ka mga refrigerated container vans nga nagabalor sang kapin ₱300M nga smuggled agricultural products gikan sa China kahapon nga adlaw, Hulyo 8 sa Subic Port Subic, Zambales. Nabuksan sang awtoridad ang 10 sa 31 ka mga van nga may unod nga bombay, carrots, kag frozen nga mga isda kag ginpatihan nga amo man ang unod sang nabilin nga mga van apisar nga nakadeklarar ang mga ini chicken lollipop kag chicken karaage Suno kay DA Secretary Francisco Tiu Laurel, halos tanan nga shipment nga may unod nga mga gin-smuggle nga agricultural products ang gikan sa isa lamang ka source. Ginpahayag sang DA nga “matter of national security” ini tungod nga mataas ang peligro nga ginadala sini kag ginakabig nga biohazard ang tanan nga ginapasulod nga pagkaon sa Pilipinas. Bangud sa ini, nakigsapol na ang DA sa Philippine National Police kag sa bag-o nga commissioner sang BOC nahanungod sa ini. Gina-monitor na sa karon sang Food Drug Administration(FDA) ang tanan nga mga shipment ilabi na gid ang gikan sang port sang Xiamen, China. Samtang, magalab-ot naman sang kapin 100 ka mga indibidwal ang ila pasakaan sang kaso bangud sa nagapadayon nga pag-smuggle. Sa karon, yara na sa 20 ka mga kumpaniya ang blacklisted sa pag-import sang mga produkto lakip na ang duha ka mga consignees sang na-intercept nga produkto. Kun madumduman, may yara man nga na-intercept nga container sang mga smuggled agricultural products sang nagligad nga semana sa Manila Port nga gikan man sa China.
