PROVINCIAL CAPITOL – Ginpasiguro ni Governor Eugenio Jose Lacson nga may nabilin pa nga pundo para sa pagkaon sang mga pumuluyo nga apektado sang pag-alburuto sang Bulkan Kanlaon.
Ginpahayag sang gobernador nga wala pa naubos ang P50 million nga ginhatag sang Office of the President sa Provincial Government agud ibulig sa mga evacuees.
Sa karon, ginakuha lamang sang Capitolio ang husto nga numero sang mga pumuluyo nga nabilin sa evacuation facilities matapos nga may ginpapauli na nga mga pumuluyo tinalikdan nga weekend.
Nahibaluan nga kapin 1,800 ka mga pumuluyo sang Barangay Cabagnaan nga nagapuyo sa nasakpan sang 6-km extended danger zone sang Bulkan Kanlaon apang yara lamang sa higad sang dalan ang balay ang gintugutan nga magpauli.
Sa karon, kapin 1,000 na lamang ang nabilin sa mga barangay sites sang Mansalanao, Biaknabato kag Masulog, tanan sa La Castellana, samtang may iban nga nagapabilin pa sa mga family tents sa campus sang Cabacungan National High School Extension sa Barangay Masulog.
Sila ang ginasuportahan sang DSWD kag barangay samtang wala pa nakabalik ang community kitchens sang probinsiya.