Ginpasakaan na sang kaso nga murder si alyas “RR”, ang driver sang motorsiklo nga ginasakyan ni Mark Pelayo nga nag-random shooting sa Brgy. Lantad, ciudad sang Silay alas-6:20 sang Hulyo 10 sang gab-i.
Ini tungod nga desidido ang pamilya sang isa sa biktima nga si Fernando Alarcon nga magpasaka sa kaso matapos nga ginbawian ini sang kabuhi sang Hulyo 12 alas-4 sang hapon samtang ginabulong sa ospital.
Si Alarcon ang nakaagom sang pilas sa parte sang iya tiyan bangud sa pagpangluthang ni Pelayo.
Ini ang ginkumpirmar ni Silay Component City Police Station Chief of Police PLt. Colonel Mark Anthony Darroca.
Samtang, nagapabilin naman sa ospital ang duha ka mga biktima nga sanday Christopher Tupaz kag Wilmer Montarde.
Suno kay Darroca, gin-file sang Silay City Prosecutor’s Office ang kaso nga murder batok kay alyas “RR” kag to follow naman ang kaso nga frustrated murder kon ma-release na ang medical abstracts nanday Tupaz kag Montarde.
Sa karon, yara sa kustodiya sang Silay CCPS ang suspek kag nagahulat sang iya commitment order.
Ginaalegar naman nga nagbato si Pelayo sa ginpatigayon nga man hunt operation sang kapulisan sa Barangay Burgos sa ciudad sang Cadiz nga nagresulta sa iya kamatayon samtang si alyas “RR” naman ang boluntaryo nga nagsungka.