Ginpirmahan ni Mayor Greg Gasataya ang Executive Order (EO) No. 015 Series of 2025 nga nagatukod sang City Road Clearing Task Force.
Ang EO nagamando sa Task Force nga manghawan sang mga road obstructions kaangay sang illegal street vending encroachments, unauthorized parked vehicles kag iban pa nga violations nga nagasablag sang mobility sa lugar, public safety kag kinamatarong sang mga pedestrians.
Ang City Legal Officer ukon ang duly designated officer sini ang maga-issue sang Notice to Vacate sa mga property owners ukon vendors nga natumod sang Task Force nga may violations. Hatagan sang 10-day non-extendible period ang mga natungdan agod boluntaryo nga hawanan ang mga illegal structures.
Nasaad man sa EO nga magahatag sang post clearing report ang Task Force sa barangay nga ginhawanan sang illegal structures. Mangin obligasyon na sang barangay ang pag-mintinar sang ginhawanan nga lugar agud indi na magbalik ang mga obstructions.
Obligado man ang Task Force nga magpatigayon sang enforcement, mag-monitor sang compliance kag magrekomendar sang legal ukon disciplinary actions batok sa mga non-complying barangay officials.
Ang City Engineering’s Office kag Bacolod Traffic and Transport Management Department (BTTMD) ang magaupod sa pag-implementar sang clearing operation kag maga-submit sang monthly accomplishment report sa Office of the Mayor kag Vice Mayor.
Si retired PCol. Levy Pangue ang ginbutang nga focal person sang Task Force. Sa nahibaluan nga halin pa man sang nagligad nga mga semana nagapanghawan na ang CLO Enforcement Unit sa pagpamuno ni Pangue nga gin-unahan sa SK Federation Office sa Brgy. 16, mga display furniture sa dalan Lopez Jaena sakop sang Brgy. 27 kag mga ambulant vendors kag parking sa guwa sang ETCS-2.
Sa interview kay Pangue kahapon, gin-confirm sini nga ginahulat sini ang EO para sa pagpadayon sang pagpanghawan sang illegal structures sa dalanon sang Bacolod. | DYHB News