NEGROS OCCIDENTAL- Ginahatagan sa karun sang importansya ni Negros Occidental 5th District Congressman Dino Yulo ang kabuhi sang tagsa ka mga indibidwal komparar sa mga imprastraktura nga maguba tuga sa ulan kag pagbaha sa probinsya.
Ginpahayag ni Yulo, ang quinto distrito ang isa sa mga distrito nga apektado sa karun sang mainulanon nga panahon nga ginalakipan sang Isabela, Binalbagan, Himamaylan City, Moises Padilla, kag bahin sang Hinigaran, kag La Castellana.
May pila sa mga lugar nga apektado sang pag-overflow sang tubig nagikan sa suba rason nga pila sa mga residente ang nabahaan kag nag-evacuate.
Pila man sa mga imprastraktura ang nagkalaguba apang suno sa kongresista mas importante ang kabuhi sang tawo.
Ginkombinsir man ang mga pumuluyo ilabi na sa mga naga-istar sa kilid sang taytay nga magbiya sa ila nga balay para sa ila nga proteksyon sa possible nga padayon nga pag-ulan kag pagbaha.
Nagpasiguro si Yulo nga nakastandby ang ahensya sang gobyerno kag ang iya opisina para sa nagakaigo nga bulig sa mga apektado sang kalamidad.