PROVINCIAL CAPITOL – Indi pa sa karon mapat-od kun malakip sa mga makabaton sang livelihood assistance ang mga internally-displaced persons (IDPs) sa La Castellana nga ginpili ang magpauli sa baylo nga magtiner sa evacuation center.
Ginpahayag ni Office of the Civil Defense Negros Island Region Director Donato Sermeno III nga isa ini sa mga gintalakay sa pagsinapol sang Regional Inter-Agency Coordinating Cell (RIACC) kahapon, Hulyo 22.
Ang Department of Social Welfare and Development (DSWD) ang may ginaproponer nga livelihood assistance kag cash-for-work program apang indi pa ini mapatuman bangud sang discrepancy sa numero sang IDPs sa aktwal nga nabilin sa evacuation center.
Nahibaluan nga nagpauli ang 586 ka mga pamilya ukon 1,850 ka mga indibidwal sa Barangay Cabagna-an, nga sakop na sang 6-kilometer extended danger zone.
Suno kay Sermeno, bangud nakapauli na ang mga ini sa ila tagsa ka mga puluy-an, indi na sila makabig nga IDPs rason nga pagatun-an pa sang DSWD kun malakip ang mga nagpauli sa maka-avail sang livelihood assistance.