Indi makakas ang mga duda sang mga tawo sa sinuhulay nga nagakatabo ilabi na sa mga government employee ukon otoridad, apang tubtob diin bala ang imo panindugan sa imo ginsumpaan nga serbisyo? Isa ka rehiyon sa pungsod Russia ang unod karon sang headlines sa diin, ginatestingan sang otoridad ang isa ka pamaagi agud nga masolbar ang kurapsyon. Nahibaluan nga sa amo nga pungsod, ang kurapsiyon sa pwersa sang kapulisan ang isa gid ka indi matago nga reyalidad. Apang sa isa Rostov region, ginapatuman sang regional Main Directorate of the Ministry of Internal Affairs ang paghatag sang reward sa mga pulis nga nagapamalibad sa ano man nga suhol kag gina-report man ang mga tawo nga naga suhol sa ila. Diri gilayon ginapasakaan sang criminal case ang tawo nga nagapangsuhol bilang pagsunod sa Article 291 sang Criminal Code of the Russian Federation. Apisar sang maayo nga patakaran, ginkwestiyon ini sa gihapon kaangay sa kun ngaa police lang sang Rostov ang gina-compensate kag kun sa diin ginakuha ang kwarta para sa reward system. Sa pihak sang kontrobersiya sa ini nga inisyatibo, nagapadayon lang sa gihapon ang opisina sa pagsunod sa ini nga mando. Ginkumpirma man mismo sang Rostov Main Directorate of the Ministry of Internal Affairs nga may nakabaton na sang financial rewards.
