Dako ang pagpasalamat ni Ronald Fernandez, isa ka person with disability matapos nga nabuligan ini sang RMN DYHB Bacolod 747 paagi sa Sentro Serbisyo Program nga makapuli sa iya lugar sa Novaliches, Manila matapos ang pila ka tuig nga nagtinir sa Murcia, Negros Occidental.
Suno kay Fernandez, nalipay ini bangud nga matapos ang pila ka tuig makit-an na sini ang iya pamilya sa Manila.
Ginpahayag sini nga sang 2021, nagpauli ang iya asawa nga tumandok sa banwa sang Murcia kag nag-upod man ini.
Nagtaliwan ang iya asawa sang nagligad nga tuig rason nga naga-isahanon na lang ini nga nagapangabuhi sa Murcia.
Si Fernandez ang anay nagatrabaho bilang security guard sa Manila kag sang nagsaylo ini sa Negros Occidental, nagtrabaho man ini bilang reliever nga gwardiya sa mga establisyemento.
Sang tinalikdan nga Hulyo 8, nagpadulong si Fernandez sa DYHB dala ang paglaum nga mahatagan ini sang tsansa nga makaatubang si Radyoman Yves Montecillo kag Radyoman Nikki Magbanua agud nga makapangayo sang bulig nga makaupod na sini ang iya pamilya sa Manila.
Natigayon nga nagawaran sang plane ticket si Fernandez kag magapapuli na ini subong nga adlaw sa iya pamilya sa Manila.